Hendur

Fallegar hendur eru mikil prýði og það verður sífellt algengara að konur og karlar leiti til fagmanns til að fá handsnyrtingu. Við notum mjög góða, sérhannaða línu frá Alessandro, sem vinnur gegn ótímabærri öldrun og viðheldur góðu ástandi handa. Viðskiptavinir geta valið úr stórri línu, allt eftir þörfum hvers og eins.

Handsnyrting tekur tiltölulega skamma stund miðað við hvað hún getur enst lengi og er punkturinn yfir i-ið í heildarútlitinu. Yfirleitt er byrjað á því að nudda kornakremi á hendurnar til að taka dauðar húðfrumur, og húðin þannig undirbúin til að taka betur við þeim efnum sem við notum til að næra hendurnar. Því næst eru neglurnar þjalaðar og mótaðar, settar í volgt handabað svo auðvelt sé að fjarlægja naglaböndin, og neglurnar sléttaðar og bónaðar (oft kallað buffering). Í lokin eru hendurnar nuddaðar og neglur lakkaðar með glærri næringu og naglalakki í lit ef viðskiptavinurinn kýs það.

Meðferðin tekur oftast um 60 mínútur og vel hægt að kíkja í tímarit og fá sér kaffi og súkkulaði á meðan.